我相信大家每年總會去一兩次旅行，我講嘅唔係去大陸、澳門那些比較近嘅地方，而係東南、歐洲、美加澳那種比較遠嘅地方。
經過多年經驗，去旅行我一定係自由行，因為唔想比人好似趕鴨仔咁，我鍾意幾點起身都得，想去邊食乜都得，唔使迫我去啲唔知乜商舖買野，又唔使同一啲唔知乜人同枱食飯，無禮貌又好似老馮咁嘅團友一齊。相信大部份人都同我一樣。
咁去旅行前一定要Book定酒店、門票、Plan好路線、揾好曬邊到租車、買火車票等等之外，有三件事我一定會做，唔做一定後悔。
第一買旅遊保險，因為我去咁多次旅行，大大話話都Claim過4、5次，有試過係羅馬唔見野，有試過係日本跌爛左部單反，有試過因三號風球，係香港入左閘但上唔到機，最近一次係倫敦轉機返來比國泰整爛個喼，你睇可以爛成咁，真係唔知啲運輸點解可以咁叻。
所以結論係一定要買保險，而且一定要包括有飛機Delay個種。
第二一定要做係係香港買旅遊Sim，現在好多選擇而且都好平，試過去韓國以為去幾日唔買啦，點知去到間酒店Wifi屎到不堪，街上又唔易有Wifi，搞到有個景點差啲去唔到。
最後一樣就係帶定一張可以入機場貴賓室嘅信用咭，近年已經好多人知同用，因為可以免費入去食魚蛋粉同飲吓野，然後先上機，對於坐廉航就啱曬啦，但最重要一點係正如我上面提過，有一次因三號風球，係香港入左閘但上唔到機，當時坐廉航，而航空公司安排又超差，只係比張餐飲Coupon就打發左二百幾人，最大獲係個次足足Delay左24小時，整整一日，好多人就係咁係機場地下訓左成晚，又硬又涷你話死唔死。我同我老婆就好彩入左貴賓室睇下、上下網、沖個涼、然後訓係Sofa上、都辛苦、但比起訓地下無得食不知好幾多。返到港當然又第一時間Claim返保險，保險公司每兩小時都有錢賠，咁都叫做心理平衡返小小。
當然想Claim保險一定要有足夠Prove，例如機場Report、有無報警、航空公司信等等。
所以旅行必做呢三件事！
[embedyt] https://www.youtube.com/watch?v=dUidTyJxvdo[/embedyt]
